Bisekleta, traysikol gidumbol sa kotse; 1 patay, 9 naangol

CEBU, Philippines - Usa ang patay samtang siyam ang naangol human gidaro sa usa ka kotse ang usa ka bisekleta ug traysikol sa barangay Canjulao, dakbayan sa Lapulapu kagahapon sa kaadlawon.

Ang patay dihadiha mao si Basilio Carmarillo, lumad nga taga barangay Cansuhi, lungsod sa Argao ug tinun-an sa Sisters of Mary sa Minglanilla nga nagsakay sa iyang bisekleta.

Ang mga naangol luwan sa traysikol mao sila si Vercel Jayme, 32, residente sa Kalawisan, Lapulapu ug drayber sa traysikol ug mga pasahero nga sila si Reynold Bensi, 32, Rosita Bering, 70, Rogelio Sumalinog, 47, Phil Pejo, 29 ug Belinda Repdos, 33, pulos taga-Lapulapu.

Samtang ang nagmaneho sa Nissan Sedan nga midasmag sa mga biktima mao si Danilo Dungog Japson, ulitawo ug residente sa sitio Thunder, barangay Babag, Lapulapu uban sa iyang mga higala nga sila si Rechel Seguesabal, 20, ug Jocelyn Ningue, 20, mga residente sa Lutopan, Toledo.

Base sa imbestigasyon ni PO1 Romello Adolfo sa traffic division sa dakbayan sa Lapulapu nasayran nga mga alas 5:30 kagahapon sa kaadlawon gikan sa panimalay si Japson padulong sa sentro sa dakbayan sa Lapulapu alang sa paghatod sa iyang duha ka higala, apan nadumbol sa bisekleta ug traysikol.

Si Carmarillo nalagpot sa layo gikan sa iyang bisekleta, hinungdan nga patay kini dihadiha.

Samtang nadumbolan usab ni Japson ang traysikol hinungdan sa pagkatuwad niini.

Si Japson nga wala na makakontrolar sa iyang pagmaneho sa iyang sakyanan didto nahulog ug mibangga sa tindahan ug ang mga higala niini lakip sa naangol sa maong disgrasya.

Matud pa ni PO1 Adolfo nga hubog si Japson nga nagmaneho sa iyang sakyanan ug gumikan sa kakusog sa iyang pagpadagan nadumbolan niini ang mga biktima. - BANAT NEWS