CEBU, Philippines - Kritikal ang kahimtang sa duha ka minor de edad nga giingong mga sakop sa Bloods gang human dunggaba sa amahang nanimalos tungod sa pagkulata sa mga biktima sa anak niini. Ang pagpanunggab nahitabo alas-2 pasado ang takna sa miaging kaadlawon sa dalan Punta Rizal sa barangay Pajo, dakbayan sa Lapulapu dihang gidunggab ni Joseph Sarmiento, 43, nga taga Gun-ob sa maong dakbayan. Ang duha ka biktima nga giingong sakop sa Bloods gang nag-edad og 17-anyos nga pulos residente sa nahitaboan giingong maoy mitabang og kulata sa 16-anyos nga anak sa suspek nga nadala sa tambalanan gumikan sa grabeng bun-og nga nahiaguman.
Si SPO3 Rex Ybañez miingon nga sa sayo pa nianang milabay'ng gabii gikatahong gikulata ang anak sa suspek diha sa maong dapit ug gumikan sa gidangatan sa anak gipangita niini ang mga mikulata sa anak.
Ang usa nadunggaban sa tiyan ug ang usa sa tuong ilok ug parehong gidala sa Lapulapu District Hospital. Si Sarmiento mitahan dayon sa kapolisan human sa hitabo. - Romeo Limpangog (BANAT NEWS)