Gibuwagan sa uyab naghikog

CEBU, Philippines - Tungod sa kaguol human gibuwagan sa iyang hinigugma usa ka 19-anyos nga estudyante sa Poblacion lungsod sa Madridejos isla sa Bantayan ang naghikog niadtong Biyernes sa alas 6:00 sa buntag.

Ang nagpakamatay pinaagi sa paghikog mao si Ryan Malazarte, 19, molupyo sa nahisgutang lugar ug Information Technology (I.T.) student sa maong lungsod.

Matud ni SPO1 Wayneright Desabelle sa Madredijos Police dihang nahinabi sa Banat News ang apuhan ni Malazarte nga si Lilia Jumantic, 57, maoy nakadiskubre sa biktima nga wala nay kinabuhing nagbitay sulod sa ilang balay nga dunay higot nga bakus sa liog ug gibaat ang pikas tumoy sa kahoy ibabaw sa balay.

Daling nangayo og panabang sa mga silingan ug gisuwayan pa unta pagtabang apan nabugto-an na gyud kini sa kinabuhi.

Subay sa gihimong imbistigasyon sa kapulisan nasutang naguol kini human mag-away sa iyang hinigugma nga gitago lang ang pangalan niadtong miaging adlaw nga giingong misangpot sa pagbuwag kaniya sa babaye.

Gituohang niadto pang Huwebes sa gabii naghikog si Malazarte apan niana lang pagka Biyernes sa buntag nadiskobrihan sa mga kabanay.   (BANATNEWS)