Polis gireklamong nagpabuto

CEBU, Philippines - Usa ka polis nga nadestino sa Barili Police Station ang gipasanginlan sa mga residente nga nakainom ug nagpabuto sa iyang armas diha sa barangay Mohon, dakbayan sa Talisay niadtong Biyernes sa hapon. Ang gireklamo mao si PO3 Michael Cortes, residente sa barangay Biasong samtang ang mireklamo mao ang managsuong Mia ug Fe Babano, 47 ug 44-anyos nga mga residente sa barangay Mohon.

Ang magsuong Babano daling mitaho sa Talisay City Police Station kabahin sa maong hitabo dihang giingong hubog ang maong polis ug kalit nga mipabuto lima ka higayon sa iyang armas.

Ang mga reklamante niadtong tungura giingong namutol og mga puno-an sa Ipil-ipil diha sa nahisgutang dapit.

Apan si PO3 Cortes nga nahinabi kagahapon sa Banat News mihimakak sa pasangil batok kaniya kay matud pa niya nasayod siyang may Comelec gun ban ug dili niya isugal ang iyang propesyon.

Diha sa lugar nga nahitaboan dunay luna nga gipanag-iya sa National Housing Authority (NHA) nga temporaryong gibutangan sa mga manok nga igtatari nga gipagalam sa iyang paryente kaniya.

Si Cortes nagkanayon nga sa iyang nahinumduman gibadlong niya ang magsuon nga dili mamutol og mga Ipil-ipil tungod kay maigo unya ang mga manok apan nahibulong na lang siya nga gireklamo diay siya sa duha.

Si PO3 Cortes mibutyag usab nga niadto nagkabangi na siya ug ang magsuong Babano kabahin gihapon sa samang problema apan nahuyo lang kini sa ilang barangay ug nagpinasayloay lang sila. (Brenda Batuto)   (BANATNEWS)