Backup sa pusher misukol polis naangol

CEBU, Philippines - Usa ka polis sa lungsod sa Tabogon ang napusilan ug nalandig sa pribadong tambalanan dinhi sa dakbayan sa Sugbu human makigpinusilay ang backup sa drug pusher nga ilang gi-buy bust sa miaging alas 11:30 sa gabii sa kilid sa basketball court sa barangay Moabog sa maong lungsod.

Ang naangol mao si SPO3 Ramir Maglasang kinsa naa karun sa Chung Hua Hospital human makaangkon og samad pinusilan sa tuong bahin sa dughan dihang gipusil ni Arman Soronio.

Si Maglasang bisan samaran nakabawos kini og pusil kang Soronio nga napusilan usab sa maong polis tulo ka higayon diha sa tuong bahin sa iyang tiil ug daling gidala sa Juan Dosado Memorial Hospital sa Sogod. Si Sr. Insp. Alexander Ancao, hepe sa Tabogon Police station nga nahinabi sa Banat News nagkanayon nga gi-buy bust nila ang ig-agaw sa suspek nga si Noel Soronio.

Si Maglasang maoy nagsilbing poseur buyer dala ang marked money nga P40 ug nagpakaaron ingnong mopalit og linikit nga marijuana ug nagsilbing back-up sila si PO2 Tito Precillas ug SPO4 Douglas Amores.

Sa dihang gitunol ni Noel ang linikit nga marijuana kang Maglasang mipaila dayon kini nga polis ug dayong dakop sa pusher, apan nianang tungura si Arman nga diha sa luyo ni Noel daling mibunot sa iyang dalang .38 rebolber ug mipusil kang Maglasang sa dughan.

Human makabawos si Maglasang kang Arman ug natumba daling gisikop si Noel nila ni PO2 Precillas ug SPO4 Amores.

Sumala pang Ancao nga nakurat nalang ang mga polis dihang laing grupo nga mga ig-agaw diay sa mga suspek nga giilang sila si Cesar ug Jesus nga mga taga dakbayan sa Lapulapu ang kalit nga miabot ug miapil og pinusilay sa mga polis.

 Apan dangtan pila ka buto nanagan ang duha ka kaubanan sa mga dinakpan ug nakaikyas.

Nakuha gikan kang Arman ang usa ka 38 rebolber nga dunay duha ka kabhang ug usa ka buhing bala apan sa dihang didto na siya sa tambalanan nakit-an sa doktor ang laing usa ka .22 rebolber nga dunay unom ka mga buhing bala nga giluklok sa lawas niini. Samtang si Noel nakuhaan usab og upat ka linikit nga marijuana ug usa ka dakong putos sa pinaugang marijuana.

Matud ni Ancao ilang pasakaan si Arman og illegal possession of firearms sa Comelec gunban ug frustrated homicide tungod sa iyang pagpusil kang Maglasang.

Samtang si Noel pasakaan sa kalapasan sa Republic Act 9165 sa section 5 ug 11 kon pagpamaligya ug paghupot og ginadiling drogas.

Si Ancao mihimakak usab sa pasangil nga didto sa police station si Mayor Eboy Gungob aron unta aregluhon ang maong hitabo sanglit ang manag-agaw’ng Soronio giingong pag-umangkon ni barangay kapitan Expidito Soronio sa Moabog nga giingong tawo sa mayor.

Matud ni Ancao nga di tinuod ang maong pasangil apan iyang giangkon nga diha ang mayor sa police station aron sila pasalamatan sa ilang kalampusan pagsikop sa manag-agaw’ng Soronio.

Matud ni Ancao mihatag pa kanila si Gungob og pang-gasolina sa sakyanan kay ila man gibisita ang suspek sa Juan Dosado. Si Sr. Supt. Erson Digal, hepe sa kapolisan sa lalawigan kinsa mibisita sa Chung Hua Hospital nagkanayon nga pasidunggan nila si Maglasang ug mipahimangno sa mga sakop nga kanunay’ng magmabinan-tayon sa ilang trabaho.    (BANATNEWS)