Magdalo di motuong 'secret candidate' si Villar

CEBU, Philippines - Dili motuo ang military reform group, Samahang Magdalo nga si Ashley Acedillo sa report nga ‘secret candidate’ sa administrasyon si Nacionalista Party presidential candidate Senador Manny Villar.

Ang Magdalo misuporta kang Villar ug Senador Mar Roxas sa pagka-bise presidente base sa resulta sa botasyon sa kapin sa 400 ka mga lider sa Samahang Magdalo sa tibuok nasud niadtong bulan sa Enero atol sa general consultation sa grupo.

Ang resolusyon sa partido nga pinirmahan ni Sen. Antonio Trillanes IV, si Villar nakakuha og 52 porsiyento sa mga boto, sobra kini og singko porsiyento kang Liberal Party (LP) standard-bearer Sen. Benigno “Noynoy” Aquino III.

Sumala pa ni Acedillo nga buot mahitabo ni Magdalo chairman, Senator Antonio Trillanes IV nga kinahanglang ang kaso batok sa public officials adto gyud sa Office of the Ombudsman.

“It is our belief that a trial by publicity against Senator Villar, perpetrated mostly by political opponents, detracts from the very essence of the Filipino people’s   quest for truth and accountability which, to a large extent, the government of Gloria Arroyo and her cohorts have deprived us time and again”, pasabot pang Acedillo.

Matud pang Acedillo si Villar maoy gipili base sa competence, character ug panglantaw niini sa kaugmaon sa nasud ug labaw sa tanan kinahanglang sakop kini sa political opposition.

Lakip sa giendorsar sa Magdalo pagka-senador mao sila si Col. Ariel Querubin ug Brig. Gen. Danilo Lim nga pulos nadetiner tungod sa kasong mutiny ug kudeta; sila si reelectionists Senador Pia Cayetano ug Jinggoy Estrada; Muntinlupa Rep. Ruffy Biazon, Ilocos Norte Gov. Ferdinand Marcos Jr. ug kanhi Cavite Rep. Gilbert Remulla; Adel Tamano ug JV Bautista; Susan Ople; kanhi senador Vicente “Tito” Sotto III; ug Jose “Joey” de Venecia III.

Si Acedillo usa usab ka congressional aspirant sa North District masaligon usab nga makaserbisyo ngadto sa Sugbuanon sukwahi sa mga pagtamay sa mga kritiko kaniya.

Matud pa niini nga ang iyang pagkandidato dili tungod sa kaugalingong interes kondili, buot niyang makab-ot ang kausaban pinaagi sa pagkahimong magbabalaod ug dili pinaagi sa sumbohan sa armas o mga pag-alsa nga susama sa ilang gibuhat kaniadto.   (Lesley Caminade)    (BANATNEWS)