Mga barangay tanod angay magbantay

CEBU, Philippines - Ang hepe sa Talisay Police Station nga si Supt. Henry Biñas mipahimangno sa mga barangay tanod nga kinahanglang magmabinantayon kun motubag og alarma sa mga insidente.

Kini, aron dili madisgrasya kun mosukol ang mga kriminal.

Si Biñas nga nahinabi sa Banat News kagahapon nagkanayon nga kinahanglang usisahon una sa tanod ang sitwasyon ug kun armado ang tawong gialarma, maayong dili magpa-apupa ug motawag dayon ngadto sa mga polis.

Kahinumduman nga niining bag-o lang duha ka tanod ang nadisgrasya sa dakbayan sa Sugbo human motubag og alarma.

Giklaro ni Biñas nga walay problema ang plano nga padad-on og armas ang mga barangay tanod, apan gikinahanglang iagi sa tukmang proseso.

Apan matud niini nga subay sa balaod, ang mga tanod wala tugoti nga mahatagan og mga armas sa gobiyerno.

Ang hatagan og mga armas mao kadtong mga polis, sundalo ug uban pang mga sakop sa nagkadaiyang law enforcement units.

Sa laing bahin, ang dakbayan adunay sobra sa 100 ka mga sakop sa Talisay City Intelligence Bureau (TCIB) nga kanhi Barangay Intelligence Network (BIN) nga naglangkob sa mga tanod sa mga barangay ug mga sibilyan. Sila mohatag og boluntaryong serbisyo pagtabang sa mga buluhaton sa kapolisan sama sa pagpahigayon og mga checkpoint sa kadalanan. - Brenda D. Batuto (BANAT NEWS)