Duha gitulis, mga motor giapil og kuha

CEBU, Philippines - Duha ka tawo ang nabiktima sa pagpanulis sa managlahing takna ug dapit sa dakbayan sa Mandaue ug ang mga tulisan nga nagdala og armas nga misakiyo og dakong kantidad nga salapi ug gidala pa ang giluwanang motorsiklo sa usa sa mga biktima.

Si PO2 Melvin Pelayo sa kapolisan sa Presinto 3 sa Basak police station miila sa duha ka mga biktima nga sila si William Cosmo, 35, taga Casili sa nahisgutang dakbayan ug ang ikaduhang biktima mao si Hermes Gualllo, 33, taga barangay Paknaan sa mao gihapong dakbayan.

Matud pa ni Pelayo nga nag- withdraw og kwarta sa ATM si Cosmo ug sa paggawas kalit kining gisugat sa wala hiilhing lalaking nagbitbit og .45 kalibreng pistola ug mideklarar og tulis, sa kahadlok gitunol sa biktima ang P26,000 niining gi-withdraw.

Wala pa gyud matagbaw gikuha og apil sa tulisan ang motorsiklo sa biktima nga gi-parking duol sa ATM booth dayong ikyas.

Samtang si Guallo padulong na usab pauli dihang kalit gibabagan og nagmotorsiklong duha ka armadong lalaki, ang angkas niini daling mition og armas sa biktima dayong deklarar og tulis ug gikuha ang shoulder bag ni Guallo nga may sulod nga P20,000. Susama gihapon sa nahaunang biktima gikuha usab sa tulisan ang Honda nga motorsiklo ug maoy gisakyan sa usa ka tulisan ug nangikyas. – BANAT NEWS