Bernardez andam moatubang sa presidente

CEBU, Philippines - Ang nakontrobersiyal karon nga regional director sa Land Transportation Franchise and Regulatory Board kon LTFRB nga si director Romulo Bernardez andam nga moatubang kang Presidente Gloria Macapagal Arroyo.

Kini kun ipatawag ni Arroyo sa Malacañang tungod sa pagsumbong ni Mayor Tomas Osmeña may kalambigitan sa reklamo sa mga miyembro sa Metro Cebu Taxi Operators Association kon MCTOA.

Ang MCTOA mialegar nga may mga anomaliya sa iyang buhatan tungod sa pagdaghan na karon sa mga nagdagang taxi units sa Metro Cebu bisan paman dunay moratorium kabahin sa pag-isyu og mga prangkisa.

 Matud pa ni Bernardez nga mas ikalipay niya ang pag-atubang kang Arroyo aron makapasabot siya og tarong labot sa gipasangil kaniya sa MCTOA.

Gawas sa gireklamong pag-isyu niini og dugang prangkisa sa taxi units gipasanginlan usab kining namaligya niini sa kantidad nga P120 mil matag usa bisan og P10 ra ang bayad niini.

 Si Bernardez mihimakak niining tanang mga alegasyon ug miawhag hinuon sa MCTOA nga pormal nga mopasaka og kaso batok kaniya aron kahatagan siya og kahigayonang makatubag niini sa hustong venue.

Sumala pang Bernardez transparent kaayo siya sa iyang buhatan ug igo lamang siyang mituman sa kamandoan sa iyang mga labaw. Nagdumili hinuon   pagtubag si Bernaldez sa tinguha ni Mayor Osmeña nga matangtang siya sa iyang katungdanan sanglit andam man siyang motuman sa iyang labaw nga opisyal kun kini ilabay sa laing dapit. Samtang gipahibalo ni Bernaldez nga ang LTFRB misuspenso na sa pag-isyu sa mga prangkisa sa taxi units ug mga PUJ sugod niadtong adlaw nga Miyerkules.

 Apan wala kini labot sa reklamo kundili kamandoan kini ni LTFRB chairman Roberto Suansing tungod sa kapakyas sa ubang regional offices pagsumiter sa ilang mga imbentaryo sa mga prangkisa nga nagpadayon sa pagdagan ug uban pa.

 Gipasabot usab ni Bernardez nga kadtong nakabayad nga mga operators sa ilang pag-apply og prangkisa mahimong i-deduct na lamang ngadto sa mga bayrunon unya sa ilang buhatan. – BANAT NEWS