Plebisito sa Banawa - Englis nagkainit

CEBU, Philippines - Samtang nagkainitay na ang national ug local elections karong Mayo, nagkainit na usab samtang nagkaduol ang pagpahigayon og plebisito pagbuwag sa Banawa-Englis gikan sa barangay Guadalupe.

Ang mga pabor sa pagbuwag nga United Banawa Englis Association kon (UBEA) gikatahong nangapod-apod og mga kinilong bugas sa mga nanambong atol sa gipahigayung pulong-pulong diha sa sitio Sapang Komunidad Guadalupe niadtong miaging gabii.

Ang pulong-pulong may labot sa pagpadayon sa ilang kampanya pagbotar pabor atol sa nagsingabot nga plebisito karung petsa 13 sa Marso may labot sa laraw nga paghimong barangay sa sitio Banawa ug Englis gikan sa Guadalupe.

Si Nick Erazo nga molupyo sa maong lugar mibutyag sa Banat News nga ang mga sakop sa UBEA nanghatag og sample ballot nga pabor sa ‘yes’ ug gipasuwatan sa pangalan sa nanambong alang sa raffle.

Kadtong mabunotang sample ballot hatagan og premyo nga tag duha ka kilong bugas humay.

Matod ni Erazo ang lider sa separation movement sa ilang lugar nga si Upe Gilbert maoy nagpatapok sa mga tawo diha sa kapilya sa ilang barangay.

Hinuon daling gipasabot ni Jessie Sala, vice president sa UBEA nga dili pagpanuborno ang ilang gihimo tungod kay napulo lang ka putos nga tagsa ka kilo ug tunga nga bugas humay ang ilang gi -raffle alang niadtong mga molupyo sa maong lugar nga mitambong, ang raffle dili pinugsanay.

Giklaro sab ni Sala nga ang maong bugas gikan sa giamot-amot sa mga sakop sa gustong mabahin ang Guadalupe ngadto sa duha ka barangay.

Samtang gipasabot usab ni Crispin Villarin laing opisyal sa UBEA atol sa pakighinabi sa Banat News ‘pakulo’ lang ug dili panuburno aron impluwensyahan ang mga molupyo sa ilang gihimo.

Samtang si ABC president ug Guadalupe barangay captain Eugenio “Jingjing” Faelnar mipadayag usab sa Banat News nga nagpamatuod lang kini nga ang grupo sa UBEA maoy nanuborno ug namalit sa botos sa mga molupyo aron makakuha og suporta ang tinguha nilang pagbahin sa Guadalupe.

Gihagit ni Faelnar ang Comelec pagsusi ning gihimo karun nga pagpanghatag og kinilong bugas sa mga sakop sa UBEA sa pagsuroy-suroy ug pulong-pulong nilang himoon aron lang modaog ang ‘yes votes’ sa plebisito.

Gi-klaro ni Faelnar nga hugot usab ang ilang pangampanya nga magpabiling tibuok ang barangay Guadalupe apan gipasalig niini nga dili mohimo og pagpanuborno sa mga molopyo aron lang makakuha og suporta.

Hinoon si Sala mipadayag nga andam nilang atubangon kun duna may pormal nga reklamo ang ipasaka batok kanila tungod sa pagpa-raffle nila og kinilong bugas sa sitio Sapang Komunidad sa milabay'ng gabii. – BANAT NEWS