CEBU, Philippines - Kritikal ang kahimtang sa usa ka suspetsadong tulisan human giagtang pagpusil sa wala mailhing lalaki kagahapon sa kaadlawon diha sa tulay sa Mananga, barangay Tabunok, dakbayan sa Talisay.
Nalandig sa tambalanan si Michael Baguio, 21, samtang ang manghod niining si Joseph Baguio nagtingkagol karon sa Talisay City detention cell human sila masikop sa mga mirespondeng polis sa nahisgutang insidente.
Ang duha parehong nagpuyo diha sa barangay Tabunok sa nahisgutang siyudad.
Base sa imbestigasyon sa nahisgutang mga polis nga ang magsuong Baguio mitulis sa mga pasahero sa jeepney nga sila si Ronelyn Cuervo, 28 ug Blanche Navales, taga Deca Homes, barangay Tungkil, lungsod sa Minglanilla.
Ang duha nagsakay sa jeepney gikan sa dakbayan sa Sugbo paingon sa Minglanilla apan pag-abot sa maong lugar kalit nanakay ang managsuong Baguio nga armado og kutsilyo dayong labni sa shoulder bag ni Navales ug nanganaog.
Apan gidemalas si Michael human usa ka wala mailhing lalaki ang mipusil sa agtang niini sa dayon nilang ikyas, dali kining gitabang ug gidala sa Vicente Sotto Memorial Medical Center ug giingong talandugon pa ang kahimtang.
Si PO2 Epifanio Comendido Jr. mitug-an sa Banat News miyembro og gang ang duha ug posibleng gipusil sila sa karibal nga gang, giangkon niyang nakadawat na sila og report kabahin sa pagpanulis sa duha diha sa maong dapit.
Nabawi sa kapolisan ang personal nga butang ni Navales ug gipasakaan na kagahapon og kasong robbery hold-up. – BANAT NEWS