Upat ka balay naugdaw sa 'Lapu'

CEBU, Philippines - Naugdaw ang upat ka mga panimalay sa sitio Dapdap sa barangay Mactan, dakbayan sa Lapulapu sa nahitabong sunog alas 10:15 sa buntag apan napugngan sulod lang sa tulo ka minutos.

 Ang sunog gipaubos ni City Fire Marshall Ricardo Cornillo sa 2nd alarm apan miresulta kini sa danyos nga P200,000.

Si SFO2 Jumid Alburo, imbestigador sa kabomberohan sa maong dakbayan mibutyag nga ang mga nasunogan mao sila si Gregoria Tampus, Cerila Andales, Rey Eben, ug Ernesto Agosto.

Si SFO2 Alburo miingon nga pulos mga ginama sa light materials ang mga panimalay ug sa ilang pakisusi nagsugod ang kalayo diha sa balay ni Tampus apan wala pa matino ang sinugdanan niini apan dako ilang pagtuong faulty electrical wirings ang hinungdan niini.

Dugang pa ni SFO2 Alburo nga naglisod sila pagsulod apan nasumpaysumpay nila ang fire hoses.

Si SFO2 Alburo miingon nga base sa iyang imbestigasyon nga gihimo maoy iyang nasuta nga ang faulty electrical wiring gihapon ang nag-unang hinungdan sa kalit nga pag-ulbo sa kalayo. - Romeo Limpangog (BANAT NEWS)