D'bantayan malinawon

CEBU, Philippines - Pabiling malinawon sa kinatibuk-an ang lungsod sa Daanbantayan taliwala sa nagpadayong tensyon sa politika tali sa kampo ni Engr. Augusto Corro ug Dr. Jose De Leon nga desididong mo-asumer hulip ni Mayor Sun Shimura ug Bise Mayor Ma. Luisa Loot bisan og duna pay motion for reconsideration nga pending sa Comelec en banc.

Si PO2 Henry Comfuesto sa Daanbantayan Police dihang nahinabi sa Banat News mibutyag nga nabalik na sa normal ang kalihukan sa lungsod ilabi na niadtong dunay transaksiyon sa balay lungsod.

Kini tungod kay dunay mga polis nga gipakatap ang hepe nga si Chief Insp. Laurel Almerante sa gawas nga bahin sa munisipyo inabagan sa mga sakop sa Special Reaction Unit (SRU) ingon man mga sakop sa Regional Mobile Group (RMG) aron motabang pagpatunhay sa kahusay ug kalinaw.

Si Sr. Supt. Erson Digal, director sa Cebu Provincial Police Office mitug-an sa mga tigbalita nga mihulpa na ang tensyon sa Daanbantayan apan aron makasiguro ipabilin gihapon ang duha ka team sa SRUs, samtang masaligon kining magpabilin gihapon ang 78th IB.

Kahinumduman nga wala ma-serve ni Department of Interior and Local Government (DILG-7) director Pedro Noval ang writ of execution nga giluwatan ni Bogo RTC Judge Antonio Marigomen nga nagmandong palingkuron na sila si Corro ug De Leon, kini tungod kay duna pay pending nga mosyon sa Comelec en banc ang kampo ni Shimura ug Loot.

Gipasalig sa kapulisan nga ipatuman nila ang maximum tolerance tali sa duha ka magkasunging kampo. – BANAT NEWS