Igsuon sa suspek pagpatay sa titser sa Binlod gipatay

CEBU, Philippines - Gipusil patay sa miaging adlaw ang igsuon sa gitumbok nga mipusil-patay sa maestro sa Binlod Elementary School, lungsod sa Argao.

Si Arcieli Cabungcal gipusil-patay sa sitio Baha-Baha, barangay Poblacion 3, sa duha ka nag-bonnet ug wala mailhing lalaki nga nag-motor nga walay plate number.

Si SPO1 Meliton Agadier nagkanayon nga bisan nag-bonnet ang mga mamumuno, nailhan gihapon ang usa niini tungod sa iyang pamarog.

Gitumbok sa mga saksi nga usa ka Jiff Cavan ang namusil, apan sutaon pa sa kapolisan ang kamatuoran niini.

Dugang pa ni SPO1 Agadier nga kun aduna nay mobarog nga saksi sa maong alegasyon ila nang mapalawman ang imbestigasyon.

Matod pa ni SPO1 Agadier nga aduna sila'y nadawat nga estorya nga nasuko ang grupo ni Arnel ngadto sa iyang manghod tungod kay gikatahong si Arcieli maoy mibutyag sa mga suspetsado sa pagpusil-patay ni Romeo Duran nga maestro sa Binlod, Argao. Si Arnel maoy gitumbok nga mipusil kang Duran.

Nasayran usab ni SPO1 Agadier gikan sa mga saksi nga nahiubos si Arcieli ngadto sa iyang igsuon nga wala mokuyog sa pagpamusil nila sa Binlod hinungdan nga wala hinuon kini mabahini sa gibayad nga P3 mil.

Si SPO1 Agadier nagkanayon hinuon nga padayon pa silang nag-imbestigar sa insidente.