Cabancalan bridge gisubhan

CEBU, Philippines - Giinugurahan kagahapon sa udto ni Pres. Gloria Macapagal-Arroyo ang taytayan nga nagkutay sa barangay Cabancalan ug barangay Canduman, dakbayan sa Mandaue.

Mga alas 12:15 kagahapon sa udto miabot si Arroyo gikan sa amihanang Sugbo ug pag-abot sa tulay, si Kongresista Nerissa Soon-Ruiz ug Mayor Jonas Cortes misugat sa presidente ug miuban sa "unveiling ceremony" sa taytayan.

Lakip sa mitambong sa maong kalihukan, mao si kanhi Sacred Heart School-Jesuit President Fr. Ernesto Javier nga mihatag sa iyang dakong pasalamat sa maong proyekto nga dako og ikatabang sa mga tinun-an nga kanhi kanunay malangan gumikan sa bagang duot sa trapiko sa dalan Canduman.

Si Soon-Ruiz sa iyang bahin mipadayag nga gumikan sa pipila ka hangyo kaniya sa mga residente ug mga motorista alang sa alternatibong dalan, iyang gihingusgan ang pagpatuman sa proyekto pinaagi sa paghangyo kang Arroyo.

Ang maong proyektong Cabancalan-Canduman Bridge gisugdan niadtong bulan sa Marso tuig 2009 ug nahuman kini sulod sa siyam ka bulan niadtong Disyembre 5, 2009.

Nagkantidad ang maong taytayan og P48 milyones ug gipatuman sa Department of Public Works and Highways. – BANAT NEWS