Magtiayong hapon naghikog sa resort

CEBU, Philippines - Patay nang napalgan sulod sa kuwarto sa usa ka hotel resort sa dakbayan sa Lapulapu ang magtiayong Hapon nga pulos na mga tigulang.

Ang magtiayong Hapon nailhan nga mao sila si Takao Ouchi, 70 ug ang asawa niini nga si Okiko, 84, residente sa barangay Camputhaw, dakbayan sa Sugbo.

Ang magtiayong Ouchi nakit-ang patay sulod sa usa ka lawak sa Blue Reef Hotel and Resort sa barangay Marigondon.

Matud pa ni SPO2 Rolito Jumao-as sa Crime Against Persons Section sa Lapulapu City Police Office, nasuta nga misulod sa maong resort ang magtiayong Hapon niadto pang adlaw’ng Lunes, Pebrero 22, sa buntag ug kagahapon unta kini sa mga alas 12 gikatakdang mo-checkout.

Ang mga room boys sa maong hotel nagpulipuli na og tuktok sa Room 401 diin nag-okupar ang magtiayong Hapon apan walay mitubag kanila.

Gumikan niini, ilang gitawgan ang higala niining Pilipino nga si Mariluo Enopina nga nagbilin og numero sa cellphone sa front desk sa maong hotel aron kun unsay gikinahanglan sa magtiayon, siya maoy kontakon.

Sa pag-abot ni Enopina, giablihan ang lawak. Apan sa pag-abli, ilang nakita ang magtiayon nga nagbuy-od na ug adunay mga hikot sa liog gamit ang pisi sa kortina sa maong lawak.

Sa pakisusi ni SPO2 Jumao-as, walay nakitang kaguliyang sa maong lawak hinungdan nga posibleng naghikog ang magtiayon.

Pipila ka mga empleyado sa maong hotel mipadayag nga sa dihang wala pa mahitabo ang insidente si Takao mipadayag ngadto kanila nga ang ilang pagpuyo sa maong hotel maoy ilang katapusang “honeymoon” ug mihatag sa pulong nga “sayonara.”

Samtang si Felix Rebaton, drayber sa ES Youth Foundation diin si Takao maoy kanhi manager mipadayag nga si Takao miretiro sa iyang trabaho sa maong foundation gumikan sa pagkaparalitiko sa iyang asawa nga si Okiko aron personal kini niyang maatiman.

Wala magdahom si Rebaton ug Enopina nga mahimo sa maong magtiayon ang pagpakamatay sa resort sila mihimo sa ilang katapusang paglingawlingaw.

Si Takao usa ka retiradong TV commercial director sa Japan sa wala pa mahimong manager sa foundation.

Samtang si Okiko usa kanhi ka scriptwriter sa Japan ug mi-uban sa iyang bana dinhi sa Pilipinas ug nahimong Filipino citizen.  – BANAT NEWS