Putol nga kamot napalgan

CEBU, Philippines - Ang mga molupyo sa sitio Galaxy, barangay Tanke, dakbayan sa Talisay naukay kagahapon sa buntag human nila mapalgi ang naputol nga tuong kamot sa tawong patay nga gidagsa sa baybayon sa maong lugar sa miaging adlaw.

Ang maong bahin sa kamot giingong gipanag-iya sa usa ka tawong gipanigbas ug napalgang patay niadtong Lunes sa buntag didto sa sapa sa sitio Kalinaw, San Rafael-Tanke, kinsa hangtod sa pagkakaron wala pa hiilhi.

Sila si PO3 Mikie Espina ug PO2 Stephen Sefuesca sa Homicide Section sa Talisay City Police Station maoy mikuha sa maong kamot ug tua gisulod karon sa lungon nga nahimutangan sa lawas niini sa Saint Francis Funeral Homes sa barangay Bulacao, Talisay.

Hinuon si Erlindo Pelayo ang giingong maoy mipatay sa maong tawo nasikop dayon nila ni Espina ug Sefuesca niadtong Martes sa hapon didto sa basurahan sa sitio White Road, barangay Inayawan, dakbayan sa Sugbo.

Kini human siya itudlo sa tulo ka mga menor de edad nga matud pa maoy miligid og tigbas hangtod namatay ang biktima.

Nasayran nga nasuko si Pelayo kay ang biktima giingong misulod sa iyang bungsod ug gipanguha ang isda sa sulod niini ug wala mopatuo dihang gibadlong.

Matud pa gumikan sa kalagot ni Pelayo giligid og tigbas niini ang biktima pinaagi sa iyang sundang hangtod nga nakabsan kini sa kinabuhi.

Midugang si Espina nga hangtud sa pagsuwat niining maong balita wala pay mipatim-aw nga tagtungod sa biktima ngadto sa punerarya. - Brenda D. Batuto (BANAT NEWS)