Polis nga nakapusil gidepensahan

CEBU, Philippines - Gipanalipdan sa hepe sa kapolisan lalawigan sa Sugbu ang mga kapolisan sa Cordova nga nakapusil sa duha ka mga mananagat nga nanglabay’g dinamita sa fish sanctuary sa maong lungsod niadtong Domingo sa hapon. Kini human sila makadawat og reklamo gikan sa mga tagtungod sa mga biktima nga mao sila si Richard Oca ug Joseph Laboca, pulos hingkod nga mananagat sa barangay Tanke, dakbayan sa Talisay.

Ang nakapusil sa duha mao si PO2 Charley Valmoria sa Cordova Police Station.

Nasayran nga ang kapolisan sa Cordova uban sa duha ka mga sakop nga Marine watchman nagpatrolya sa kadagatan sa lungsod isip kabahin sa ilang Oplan Kalikasan.

Matud pa ni Sr. Supt. Erson Digal ang director sa kapolisan sa lalawigan sa Sugbu nga samtang gianinaw sa mga otoridad ang kadagatan gisirkulohan kini sa napulo ka mga pump boat sa mananagat unya gilabay sila og dinamita.

Matud pa ni Digal nga maayo nalang kay gipusil ni PO2 Charley Valmoria ang pumpboat sa mga biktima nga maoy milabay og dinamita kanila kay kun wala pa sila maoy hipatyan niini. - BANAT NEWS