Giluba sa kuwang-kuwang kritikal

CEBU, Philippines - Kritikal ang kahimtang sa usa ka ulitawo human kini dunggaba sa silingan niyang kuwang og pangisip didto sa sitio Eskwelahan barangay Basak, dakbayan sa Lapulapu kagahapon sa kaadlawon.

 Ang biktima mao si Darwin Pahugot, 25, ulitawo, nga taga Eskuylahan, samtang ang suspetsado mao usab ang iyang silingan nga si James Toling, 21, ulitawo, giingong nalisoan sa maayong pangisip.

 Si SPO3 Rex Ibanez sa kapolisan sa dakbayan sa Lapulapu mibutyag sa Banat News nga nagbarogbarog nga nagpabuhot sa sigarilyo si Pahugot sa eskina sa Basak dihang miduol si Toling ug gipangayoan siya og sigarilyo.

 Si Pahugot kinsa hugot usab kaayong mibalibad kay wala siya'y sigarilyo, giduslak ni Toling sa iyang ice pick ug didto kini motaroy sa dughan sa biktima.

 Samtang gihatod ngadto sa Vicente Sotto Memorial Medical Center si Pahugot, gipangita usab sa kapolisan si Toling kinsa misibat dayon human makadunggab. - BANAT NEWS