6 ka tawo angol sa dinasmagay

CEBU, Philippines - Unom ka tawo ang naangol sa dinasmagay sa usa ka pick up ug jeep pasaheroan didto sa Marcelo Fernan Bridge (MFB) sa barangay Pusok, dakbayan sa Lapulapu sa miaging kaadlawon.

Ang mga biktima mao sila si Ricky Joadan, 33, minyo, nga taga Medellin ug drayber sa PUJ, Darrel Baquial, 25, taga Salvage, barangay Looc, dakbayan sa Lapulapu, Chello Casampol, 49, taga Canjulao, dakbayan sa Lapulapu, Rustom Tampus, 25, Jocelyn Roma, 46; ug Rube Roma, 41, ang tanan taga Bankal sa maong dakbayan.

Si Argie Laguna, 36, taga Capitol Site, dakbayan sa Sugbo nga drayber sa pick-up walay bun-og.

Si PO2 Johnny Hernandez sa traffic section sa kapolisan sa Lapulapu mibutyag sa Banat News  nga gikan sa Lapulapu paingon sa Mandaue ang PUJ dihang paglatay niini sa MFB gisungag sa pick- up.

 Ang mga biktima gikuha og ambulansiya sa Emergency Rescue Unit Foundation (ERUF) ug gihatod ngadto sa Vicente Sotto Memorial Medical Center sa dakbayan sa Sugbo, samtang ang drayber sa pick-up misibat. – BANAT NEWS