Nananom og marijuana gipangita

CEBU, Philippines - Gipangita sa kapolisan ang usa ka mag-uuma kinsa maoy responsableng nananom og marijuana didto sa barangay Pili, dakbayan sa Danao nga gilarot sa mga sundawo niadtong Lunes.

Kini sa dihang nakasibat si Nicasio Bentoy ang giingong maoy tag-iya sa dul-ang duha ka libo ka hamtong nang mga punoan sa marijuana nga gipangibot sa mga sakop sa 78th Infantry Battalion.

Gibutyag ni Lt. Jesus Binarao sa 78th IB nga may tawong nagpahibawo kanila kalabot sa mga tinanom nga marijuana sa Pili diin dili kaayo halayo sa ilang detachment sa maong lugar.

Matud pa ni Binarao nga ang mga sakop sa Citizen Armed Forces Geographical Unit (CAFGU) maoy nangibot sa hapit nang anihunon nga mga punoan sa marijuana.

Nasayran nga ang maong lugar dili kaayo halayo sa gilarotan gihapon sa mga sundawo sa 78th IB og dul-ang tulo ka libo ka punoang marijuana dili pa dugay.

Sa pagkakaron ang maong mga ginukod sa balaod nga mga tanom anaa na sa buhatan sa Philippine Drug Enforcement Agency (PDEA) aron dauban sa tukmang petsa.

Samtang si Bentoy gipanid-an na karon sa mga otoridad aron dakpon ug imbistigahon. - BANAT NEWS