Gitagod nga tawo 'kawatan,' suspek dakpan

CEBU, Philippines - Nadakpan sa kapolisan ang giingong mitagod patay sa wala mailhing lalaki kagahapon sa hapon diha sa sitio White Road, barangay Inayawan, dakbayan sa Sugbo samtang kini namasura uban sa iyang kapuyo.

Ang suspetsado mao si Erlindo Pelayo, 40, taga sitio Kalinaw, San Rafael, Tanke, dakbayan sa Talisay nga gitumbok sa mga nakasaksi nga maoy responsable sa pagpatay.

Kahinumduman nga niadtong Lunes sa buntag usa ka wala mailhing lalaki nga naputos sa tinigbasan ang lawas naglutaw diha sa sapa sa lugar ang napalgan sa usa ka manginhasay nga si Warlito Traso, residente usab sa maong dapit. Si PO3 Mikie Espina ug PO2 Stephen Sefuesca nagkanayon nga miangkon dayon sa nahimong krimen ang suspek ug wala mosukol dihang ilang giaresto.

Si Amy Duberpe, 41, kapuyo ni Pelayo sa pakighinabi niini sa Banat News kagahapon mibutyag nga ang ilang balay naa gitukod sa dagat ug duna sila’y upat ka bungsod (koral taliwala sa dagat nga laang sa mga isda) nga maoy ilang kuhaan og pamugas gawas sa pamasura.

Matud ni Duberpe nga mga ala 1:00 sa kaadlawon niadtong Lunes naabtan nila ang nahisgutang biktima diha sulod sa bungsod nga nanguha og isda hinungdan nga ilaha kining gibadlong.

Apan wala kini mopatuo ug mitabok pa sa lain pa nilang bungsod ug gipangguba ang koral nga kawayan hinungdan nga nasuko si Pelayo ug giduol kini, si Duberpe mibutyag nga wala siya makakita sa gibuhat sa kapuyo ngadto sa biktima sanglit midagan siya palayo.

Sumala pa ni Duberpe mitug-an ngadto kaniya si Pelayo nga nahinaykan niya og tigbas sa sundang ang nahisgutang tawo ug napatay apan wala niya hilabti ang patay’ng lawas niini diha sulod sa bungsod.

Nagtuo silang gianod lang ang patay’ng lawas niini sa bawod ngadto sa sapa diin kini mapalgi. Atol ning pagsuwat sa balita wala pa mailhi ang biktima samtang gikatakdang pasakaan og kasong murder si Pelayo. - Brenda Batuto (BANAT NEWS)