Ombudsman way nahimo sa reklamo

CEBU, Philippines - Nasagmuyo ang pamilya sa testigos sa kasong gipasaka batok sa usa ka polis sa Pardo human sa ilang paminaw sila na hinuoy naalaot sa reklamong harassment nga ilang gisang-at ngadto sa buhatan sa Visayas Ombdusman.

Ang kasong harassment kini mahitungod sa giingong pag-adto ni SPO4 Sanrico Jolejole ug tanod nga si Jimmy Tabura sa panimalay ni Laurena Tabura,inahan sa testigos nga si Sinon Tabura diha sa F. Tabura St. sa barangay Pardo niadtong Septiyembre 16, 2009.

 Si Sinon maoy testigo sa giingong pagsuway pagpatay ni Jolejole ngadto kang Reynaldo Sabellano nga gipasanginlang tulisan diha sa maong dapit niadtong Enero 11, 2009.

Ang maong kaso gihikay sa Commission on Human Rights-7 ug mirekomendar nga pakasuhan gyud ang maong polis ug ang kaubanan niining mga police assets.

 Sumala pang Laurena atol sa hearing niadtong Pebrero 11 nga kalit miabot sila si Jolejole ug tanod nga si Tabura diha sa ilang balay ug mi-cock og armas ug nangita sa iyang anak.

Sa kahadlok nga pasipad-an ang anak gumikan kay testigos kini batok sa duha gipasuksok niya kini og tago. Apan si Jolejole ug Tabura mihimakak nga miadto sila aron hudlaton ang testigo.

Matud pa nila mitubag lang sila og trouble alarm nga giingong binuhatan ni Sinon, gihimakak usab sa tanod nga duna siya’y armas.

Gumikan kay wala ma-establisar nga gi-harass ang testigo gikatahong gitambagan si Laurena ni deputy ombudsman Virginia Palanca-Santiago nga palikayon nalang kang Jolejole o ba kaha pabalhinon og puyo gawas sa Pardo.

Samtang igo lang nga gipahimangnoan ni Santiago ang mga gireklamo nga di mangabusar sa katungdanan, butang nga gikaguol sa mga reklamante sanglit daw sila naman hinuoy gipalayas sa dapit nga diin dugay na silang namuyo ug nanginabuhi.

Nagduda si Laurena gipaboran ni Santiago ang polis ug tanod tungod kay kuyog sa duha sa maong hearing ang silingan ni Santiago nga kagawad sa barangay diha sa Aznar Road, Pardo.

Apan si Santiago mihimakak nga may gipaboran siya sa ilang imbestigasyon kay bisan iyang paryente iyahang gikasuhan tungod sa lig-ong ebidensiya ug palabihon niya nga maprotektahan ang dungog ug imahe sa ilang buhatan. - Chester Abadilla (BANAT NEWS)