DILG mo-serve sa writ of execution sa D'bantayan

CEBU, Philippines - Pormal nang gi-serve ni Judge Antonio Marigomen sa Bogo City RTC ang writ of execution aron hingpit nang ma-instalar sila si Engr. Augusto Corro ug Dr. Jose de Leon sa lungsod sa Daanbantayan hulip nila ni Mayor Sun Shimura ug Bise Mayor Ma. Luisa Loot.

Kini human gipadayag ni Department of Interior and Local Government (DILG-7) director Pedro Noval atol sa interbyu sa Bantay Radyo nga nadawat nila ang kopya sa writ of execution alas 11:00 kagahapon gikan sa sala ni Judge Marigomen ug personal nga gi-serve sa sheriff nga si Eva Bintig diha sa ilang buhatan.

Samtang gipahibalo ni Noval nga mibisita na sa ilang buhatan si Atty. Liza Corro sa kampo nila ni Corro ug De Leon ug nakigsabot alang sa himuong pag-asumir niini diha sa munisipyo sa lungsod.

Hinuon gipadayag ni Noval nga nakig-alayon pa sila karun kang Police Regional Office (PRO-7) director Chief Supt. Lani-O Nerez aron moabag alang sa malinawon nga pag-instalar nila ni Corro ug de Leon.

Matud ni Noval nga kinahanglanon nila ang PNP nga moabag aron pagpatunhay sa kahusay ug kalinaw nunot usab sa mitumaw nga tensyon sa maong lungsod human nagbarikada usab ang kampo ni Shimura ug Loot sa palibot sa munisipyo aron pagsiguro nga dili maka-asumir si Corro.

Sayo niini gipadayag ni Loot nga dili gyud nila ibakante ang pagdumala sa lungsod tungod kay taas pa kaayo ang proseso ug kamatuoran niini mao ang ilang gidusong motion for reconsideration sa Comelec en banc nga nag-kwestyon sa desisyon sa Comelec 1st Division nga nagpalig-on sa desisyon sa Bogo RTC nga nag-proklamar kang Corro ug de Leon nga maoy mananaog sa milabay’ng 2007 election batok nila ni Shimura ug Loot. - Darrel Carumba (BANAT NEWS)