CEBU, Philippines - Patay diha-diha dayon ang usa ka trabahante human kini gidigo og bala sa usa ka wala mailhing lalaki samtang nagsakay og traysikad sa sitio Wang Yu Alaska barangay Mambaling sa miaging gabii.
Ang namatay giilang si Arasteo “Randy” Tionzon Villanueva, usa ka shell craft worker ug molupyo sa sitio Puntod Alaska barangay Mambaling.
Sumala pa sa imbestigasyon nga sakay si Villanueva sa traysikad ni Carlito Carpentero dihang pag-agi nila sa nahisgutang dapit kalit nga may mipusil kanila hinungdan nga miambak ug midagan ang biktima.
Apan kalit lang nalimbuwad ang biktima pipila ka metros samtang ang mamumuno dali usab nga miikyas.
Ang biktima nakaangkon og samad pinusilan sa tuong bahin sa nawong ug sa likod nga gidudahang hinungdan sa iyang hinanaling kamatayon. Duha ka slugs ang nakuha sa kapolisan diha sa crime scene.
Ang kapuyo sa biktima nga si Miraluna Pega mitug-an sa kapolisan nga niadtong Oktubre 25 sa miaging tuig nalambigit sa pinusilay ang biktima diha sa sitio Puntod Alaska. - Lesley Caminade (BANAT NEWS)