CEBU, Philippines - Grabeng naangol ang usa ka lalaki human kini gidunggab ug gidakdakan og bato sa ulo sa iyang igsuon ug pag-umangkon dihang iyahang gibadlong ang igsuon kay gibusohan sa naulahi ang asawa sa anak sa biktima.
Ang insidente nahitabo diha sa sitio Candulang sa Marigondon sa dakbayan sa Lapulapu sa milabay'ng hapon nga diin usa ka Geronimo Dacayana Munez, 51, nakaangkon og bun-og ug samad dinunggaban sa kalawasan.
Giila ang midunggab kaniya mao si Arthur Munez, 22, pag-umangkon sa biktima samtang ang midakdak og bato mao ang amahan ni Arthur nga si Delfin Munez, 53, nga igsuon ra usab sa biktima pulos mga residente sa maong dapit.
Sa imbestigasyon ni SPO2 Federick Eslit sa Crime Against Persons desk sa kapolisan sa Lapulapu nasayran nga si Geronimo igo lang mipahibalo sa pag-umangkon niini nga si Arthur ipabadlong ang amahan niining si Delfin nga dili mangunay og pamuso sa asawa sa iyang anak (umagad ni Geronimo) matag kini maligo.
Apan gikasuko hinuon kini ni Arthur hinungdan nga nagkasinukmagay ang duha. Si Delfin pagkakitang nagsinumbagay ang anak ug maguwang daling mipunit og bato dayong dakdak niini ngadto sa ulo ni Geronimo.
Si Arthur nga nakabunot usab og kutsilyo midunggab sa uyoan upat ka higayon diha sa tiyan ug paa sa naulahi.
Si Geronimo daling gidala sa Lapulapu City Hospital ug gibalhin sa Vicente Sotto Memorial Medical Center samtang dali usab nga nakaikyas ang mga suspek sa maong dapit.
Matud pa ni SPO2 Eslit nagpaabot pa sila sa hukom sa biktima kung mopasaka ba kini og kaso batok sa iyang pag-umangkon ug igsuon. (BANATNEWS)