CEBU, Philippines - Si Senadora Miriam Defensor-Santiago nga reelectionist ubos sa Nacionalista party ni Senador Manny Villar mihagit sa mga kritiko ni Villar og sinukmagay.
“Salita sila nang salita wala namang nagawa. Gusto nila ng debate, kung gusto nila, suntukan na lang tayo,” si Defensor-Santiago nagkanayon.
Ang maisugong senadora miluwat sa iyang hagit atol sa grand rally sa NP sa Mandaue Reclamation Area sa dakbayan sa Mandaue niadtong miaging gabii. Si Defensor-Santiago nga usa ka notadong graftbuster nagkanayon nga kun mapiling presidente si Villar, ang Cebu mahimong sentro sa pamatigayon ug komersiyo sa kalibutan, ug ang Ginoo molingkawas sa mga tawo sa kalisud. Ang maong rally napuno sa mga artista. Ang host niini mao si Randy Santiago ug Valerie Concepcion. Didto usab ang kontrobersiyal nga host sa Wowowee nga si Willy Revillame.
Apan bisan sa presensiya sa mga artista, adunay pipila ka supporter ni Villar nga wala nalipay sa rally ug nagbagolbol kay wala pasudla sa lugar diin gihimo ang rally.
Mga alas 7 sa gabii sa nahisgutang adlaw nangabot ang grupo sa kapin 30 ka tawo sa luyong bahin sa stage. Pulos sila nagsul-ob og mga orange nga polo shirts nga dunay markang Manny Villar. Sa dihang buot na unta silang manulod gibabagan sila sa mga polis nga nagbantay ug gipangitaan og ID pass, ang grupo sagad mga taga-Mandaue.
Ang maong mga supporters giingong dul-an sa usa ka oras nga naghuwat diha sa agianan pamasin nga makasulod ug nanghangyo sa nagbantay nga pasudlon apan wala gyud matugoti. Apan bisan pa sa ilang bagulbol wala gihapon sila pasudla hinungdan nga nanglakaw na lang ang grupo ug nagkanayon nga “adto na lang mi kang Gibo.” Si Teodoro maoy standard bearer sa administrasyon.
Lakip usab sa wala makasulod mao ang ubang mga sakop sa media kinsa buot untang mokuha og balita sa kalihukan tungod kay wala silay mga ID passes ug ang mga media ID wala ilha sa mga nagbantay’ng mga polis. (BANATNEWS)