CEBU, Philippines - Nabulit sa samad dinunggaban ang lawas sa usa ka bayongbayong dihang giligid kini og luba sa wala hiilhing kriminal sulod sa usa ka payag didto sa Patalinjug Compound, sa barangay Pajo, dakbayan sa Lapulapu sa miaging gabii.
Ang biktima mao si Paul John (kansang bansagon gipugngan) l5, nga taga barangay Pajo.
Matud pa ni SPO3 Rex Ybanez sa homicide section sa kapolisan sa dakbayan sa Lapulapu nga nag-inusarang natulog ang biktima sulod sa payag.
Dihang mikalit og sulod ang wala hiilhing kriminal ug giligid dayon siya panunggab niini.
Maayo gani kay wala siya maintimano kay naabot dayon ang mga silingang nakadungog sa iyang singgit ug panabang ug misibat dayon ang kriminal. Gihatod dayon sa tambalanan ang biktima samtang padayon pang gipangita sa kapolisan ang kriminal aron pagsuta unsay hinungdan sa maong pagpanunggab. (Romeo T. Limpangog ug Bong Soriano) (BANATNEWS)