CEBU, Philippines - Grupo sa mga negosyante og bugas dinhi sa Sugbu mopasaka og kaso batok sa mga opisyales sa National Food Authority kon NFA Central Visayas Office ngadto sa buhatan sa Ombudsman for the Visayas.
Kini tungod sa giingong anomaliya sa pagpahigayon og subasta sa imported rice alang sa Central Visayas.
Sigon sa report sila si Lelia Echevaria ug Canilo Cortisano ug mga kaubanang mga rice dealers nagkanayon nga ilang pasakaan og kasong kriminal ug administratiba sila si NFA-7 regional director Danilo Bonabon ug mga kaubanang mga opisyales sa NFA-7 regional office.
Sigon sa reklamo nila ni Echevaria ug Cortisano sila maoy naka- schedule sa mahatagan og priority number sa mga negosyanteng bugas nga moapil sa bidding kagahapong adlawa.
Ang bidding gikatakdang himuon kagahapon alas 8:00 sa buntag hangtud sa alas 5:00 sa hapon sa Pebrero 24 ning tuiga.
Apan ang ilang nahibaw-an nga niadto pang adlaw’ng Biyernes nagsugod na sa pag-apod-apod og priority numbers ang buhatan ni Bonabon hinungdan nga wala sila makaapil.
Sumala pa nila nga dunay gipaborang mga miyembro sa Grain Retailers Confederation (GRECON) si Bonabon sanglit ang nakakuha og unang siyam ka numero nakuha sa mga igsuon ug mga paryente sa mga miyembro sa GRECON.
Matud pa niini nga may anomaloso ang maong bidding sanglit ang kota nga 75 mil ka metriko toneladang gikatakdang i-import nga bugas halos nakuha na sa unang siyam ka mga rice dealers.
Samtang silang naulahi og numero wala nay kahigayonan pang makakuha bisan gamay lamang nga bahin sa imported rice pinaagi sa NFA.
Apan si Bonabon mihimakak sa maong alegasyon sanglit gisubay nila ang tukmang patakaran sa pag-apod sa mga priority numbers sa buot mosalmot sa bidding.
Gitataw niining dili usab angayang basulon ang iyang buhatan kun may laing mga dealers ang nakauna sa pagkuha sa priority numbers sanglit mao man kini ang nakauna sa pag-abot sa ilang buhatan. (BANATNEWS)