Gang war miulbo na sab, 13-anyos namatay

CEBU, Philippines - Duha ka lalaki ang napusilan usa niini menor de edad sa nagkadungang insidente sa pagpamusil sa managlahing lugar ning dakbayan nga gikalambigitan sa mga sakop sa gang.

Namatay ang usa ka 13-anyos nga taga sitio San Isidro sa barangay Mabolo human pusila sa usa sa lima ka giingong mga miyembro sa Crips gang sa miaging gabii.

Tulo sa mga gikatahapan naila lang sa mga pangalang Marjun, Tatan, Dugkal ug duha ka menor de edad nga nagpangidaron og 17 ug 15-anyos nga pulos molupyo sa barangay Carreta.

Matud pa sa silingan sa biktima nga usa gihapon ka bata, nag-disko sila sa nahisgutang lugar dihang kalit lang silang nakadungog sa buto-buto sa armas hinungdan nga migawas siya sa diskohan aron mosusi.

Sumala pa niini diha sa gawas iyahang nakit-an si Marjun uban sa mga kauban niini nga kalit miduol sa biktima dayong wala'y daghang pangutana gipusil ang biktima.

Gikatahong misuway pa og dagan ang biktima apan natumba ra usab kini ug misiyagit og “Agay!, tabang!” Bisan nalup-og na sa unahan gigukod kini sa mga suspek ug giusban pagpusil una pa biyai.

Ang biktima daling gihatud sa Cebu City Medical Center ug gioperahan tungod sa samad pinusilan sa likod apan kagahapon sa kaadlawon namatay kini.

Samtang ang duha ka suspetsado nga menor de edad nasikop ra usab sa kapolisan nga miresponde.

Sa pakighinabi sa Banat News ni PO2 Leroy Baguio kini nagkanayon nga posibleng paregla lang ang nahitabo apan aduna usab posibilidad nga panagbangi sa gang ang hinungdan.

Sa laing bahin samdan usab ang usa ka lalaki human gipusil sa duha ka wala mailhing lalaki sa Doña Pepang Cemetery sa barangay Tejero.

Si Greggy Dimana, 22, residente sa sitio Agay-ay sa nahisgutang barangay ang nakaangkon og samad pinusilan sa walang abaga samtang nakig-inom sa mga higala.

Gikatahong usa ka wala mailhing tawo ang kalit nga miduol gikan sa likod dayong diretso og pusil kang Dimana. Ang mamumuno miikyas padulong sa MJ. Cuenco Avenue.

Gisusi karon sa kapolisan ang report nga ang kainom ni Dimana sakop sa Crips gang ug posibleng napagan lang ang biktima kinsa nagpaalim na sa Cebu City Medical Center. – BANAT NEWS