Senior Citizen sa lalawigan 'misumbong' kang Davide

CEBU, Philippines - Mga senior citizens sa lalawigan sa Sugbu nasagmuyo sa panagbingkil sa duha ka mga inilang lider sa Sugbu nga mao sila si Gobernador Gwendolyn Garcia ug Cebu City Mayor Tomas Osmeña.

Kini maoy mga gipadayag sa mga senior citizens sa barangay DAS, Toledo City dihang gikonsulta ni Liberal Party gubernatorial candidate Atty. Hilario "Junjun" Davide niadtong milabay'ng adlaw.

Sumala pang Constancia Rollog, 67, usa sa mga residente sa maong dapit nasakitan sila nagtan-aw nga ang probinsya ug ang dakbayan sa Sugbu nagpabiling wala'y maayong relasyon sulod sa pipila na ka katuigan.

Tungod niini, nagtuo si Rollog nga silang mga senior citizen sa probinsya dili makatagamtam og susamang mga benepisyong naangkon sa mga senior citizen sa dakbayan sa Sugbu.

Ang mga senior citizens sa dakbayan sa Sugbu mao ray labing una sa tibuok nasud nga gipanghatagan og financial assistance nga mokabat og P4 mil matag tuig, samtang mao usab kini ang dawaton sa mga disabled nga mga residente.   

Si Davide, nga kanhi maoy first councilor sa dakbayan sa Sugbu gipakpakan og maayo ni Rollog uban sa iyang gitawag nga mga “classmates” nga mga senior citizens human kini mopasalig nga paninguhaon niyang magkahiusa ang tibuok probinsya sa Sugbu ug ang dakbayan sa Sugbu.   

Napanglantawan ni Davide nga kun magkahiusa lamang ang dakbayan ug ang lalawigan haom kini kaayo sa investments ug ihatag sa susamang benepisyo sa mga tiguwang sa probinsya sama sa naa sa dakbayan. – BANAT NEWS