Batang misakay sa PAL pugante sa DSWD

CEBU, Philippines - Ang 12-anyos nga batang lalaking nakasakay og abyon nga walay ticket usa ka semana na makaduha na niini mibuhat sumala pa sa imbestigasyon sa Police Center for Aviation Security (PCAS-7).

Ang maong bata gibalik na sulod sa Department of Social Welfare and Development Drop-in Center sa barangay Pari-an dakbayan sa Sugbu human kini madiskubrehi sulod sa usa ka abyon.

Sumala pa ni Police Center for Aviation Security (PCAS-7) chief, Sr. Supt, Joselito Salido ang maong batang lalaki nakalusot sa hugot nga security check diha sa MCIA ug nakasulod gyud sa usa ka Philippine Air Lines flight niadtong petsa 2 ning bulana.

Ang pagbalhin-balhin niini og lingkuranan maoy nakapahibulong sa ubang mga pasahero ug nagpangutana sa crew una pa kini masakping misakay lang sa maong abyon sa tuyo nga makaadto sa Manila aron apason ang iyang inahan.

Ang maong bata miikyas sa nahisgutang balay dangpanan ug nabalik human masakpi sa MCIA, apan ang gibuhat niini nakapaduda sa kalig-on sa seguridad sa MCIA butang nga gipakagamay lang hinuon sa PCAS-7, duha usab ka gwardiya ang nasuspenso tungod niini.

Sa imbestigasyon sa PCAS-7 ngadto ni Romulo Velasquez ang head sa DSWD Parian Drop-in Center mihulagway sa maong bata nga usa ka intelihente bisan pa sa iyang panuigon.

Matud pa ni Velasquez ang maong batang lalaki miabot sa ilang buhatan human kini gitugyan ngadto kanila sa usa ka gwardiya sa usa ka shipping lines niadtong Hulyo 1, 2009.

Nasuta nga ang maong minor gikan sa Samar uban sa duha ka bata sakay sa usa ka barko nga wala mamilite ug sa dihang mosakay unta kini sa laing barko padung sa kaulohan nasakpan kini sa gwardya sa maong shipping lines ug gitugyan sa Drop-in Center sa Parian dakbayan sa Sugbu. (Bong Soriano)   (BANATNEWS)