Pag-ban sa habal-habal supakon ni Luigi

CEBU, Philippines - Supakon ni congressional aspirant Luigi Quisumbing ang gikatahong na-pending mga balaudnon sa Kongreso nga nagtinguha sa pag-ban sa habal-habal.

 Sumala pa ni Quisumbing sa interview sa DyRF nga sa higayong mapili siyang kongresista sa ikaunom nga distrito sa lalawigan unahon niya pagsusi   ang maong balaudnon nga nag-ungot karon sa Ubos Balay balaoranan.

 Gihulagway ni Quisumbing nga kataw-anan kaayo ang maong lakang sanglit dugay naman nga gigamit ang motorsiklo sa pagpamasahero ngadto sa mga bukirang barangay nga dili masudlan og jeepneys.

 Matud pa ni Quisumbing nga maapektohan og maayo niini ang mga tawong nanginabuhi pinaagi niini dinhi sa Pilipinas kun mahinayon gyud ang pagpasar sa maong balaudnon.

 Gisugyot hinuon ni Quisumbing, kansang pamilya nag-unang importer og mga motorsiklo dinhi sa lalawigan sa ilang kumpanyang Norkis, nga i-regulate kini aron masigurong luwas kining sakyan.

 Sumala pa niini nga 98 porsiyento sa mga produkto sa ilang kompanya mga motorsiklo ug kasagarang mamalit niini gamiton alang sa negosyong himuong habal-habal. (Chester Abadilla)    (BANATNEWS)