CEBU, Philippines - Mga hepe sa police station sa 4th district, 5th district ug 6th district sa lalawigan sa Sugbu nakasumiter na’g mga pangalan sa mga tawong nabutang sa ilang order of battles sa illegal nga drugas.
Kini maoy gipahibalo ni Sr. Supt. Erson Digal ang director sa kapulisan sa lalawigan sa Sugbu kabahin sa gipahigayong clustering meeting niadtong milabay’ng semana sa dakbayan sa Danao.
Nakasumiter na ang mga hepe sa nahisgutang mga distrito og lima ngadto sa napulo ka pangalang nalambigit sa illegal drugs sa ilang areas of responsibility. Tuyo niini mao nga ma-pokus ang kapolisan sa matag usa ka mga drug personalities isip paghingusog sa kampanya batok sa maong problema.
Matud pa ni Digal nga ang pangalan sa maong mga drugas personalities sa 4th, 5th ug 6th district sa lalawigan sa Sugbu tua na karon sa buhatan ni Supt. Tito Satera ang deputy provincial director for operation sa CPPO kinsa mao usay naghupot sa Provincial Anti-Illegal Drugs Special Operation Task Force (PAIDSOTF).Si Digal miingon nga sunod nga magtigom karong mosunod nga semana mao na usab unya ang mga hepe sa kapulisan gikan sa 1st, 2nd ug 3rd district sa lalawigan sa Sugbu aron makasumiter usab og listahan sa mga nalambigit sa drugas sa ilang lugar.
Human niini ila gilayong pahimuon og operasyon ang mga chiefs of police sa mga tawo nga ilang nabutang sa listahan ug gikinahanglan nga ilaha gyud ning dakpon. Hayan duna sila’y ipahamtang nga sanction sa mga COP nga maoy basehan posible sa pagpalabay kanila sa laing dapit kun dili makasulbad sa problema sa illegal drugs sa ilang mga dapit. (Chester Abadilla) (BANATNEWS)