Trabahante'g lechonan giluba

CEBU, Philippines - Samdan sa ilok ang usa ka trabahante sa kan-anan human kini dunggaba sa iyang silingan didto sa sitio Quimada, barangay Guadalupe, ning dakbayan sa Sugbo sa miaging gabii.

Ang biktima nailhan nga si John Michael, 23, taga sitio Mojon, barangay Sapangdako, ning dakbayan, ug nagtrabaho sa CNT Lechon, samtang ang suspetsado nailhan usab nga si Lloyd Romero, 28, silingan sa biktima.

Sa imbistigasyon sa kapolisan, nasayran nga nagkaabot ang duha didto sa Quimada, ug tungod kay daan nang nagkadumot ang duha, wala magpauna ang suspetsado, ug ang dala niyang kutsilyo gihansak dayon niya ngadto sa tuong ilok sa biktima.

Ang biktima gihatod dayon ngadto sa   Cebu City Medical Center samtang si SPO2 Emmanuel Sarmiento sa Guadalupe Police Station midakop usab sa suspetsado ug misakmit sa kutsilyo niini nga maoy gigamit sa pagpanunggab.

Nagpahayahay na ang suspetsado karon sa prisohan sa kapolisan sa Guadalupe. –  BANAT NEWS