Lalaki nakuhaa'g shabu
CEBU, Philippines - Nasikop sa kapolisan ang usa ka lalaki nga nakuhaan og gituhoang shabu didto sa Soong 1, barangay Mactan, dakbayan sa Lapulapu sa milabay’ng gabii.
Ang nasikop mao si Casimero Igot Aying alyas Junjun, 26, ulitawo ug residente sa maong dapit.
Matud ni SPO1 Nonilon Estonilo sa Intelligence Section sa kapolisan sa Lapulapu nga samtang nag-roving sa maong dapit ilang nasigpatan si Aying nga kadudahan ang mga lihok niini.
Sa dihang midagan si Aying, gigukod kini nila ni PO1 Jasper Nuñez ug PO1 Antonio Inihao hinungdan sa pagkasikop.
Atol sa pagrikisa niini, nakuha sa posesyon ni Aying ang tulo ka gagmay’ng pakete sa gituhoang shabu hinungdan nga gidala kini sa buhatan sa kapolisan.
Matud pa ni SPO1 Estonilo nga kasong kalapasan sa R.A. 9165 ubos sa Sec. 11 Art. II ang ipasaka batok ni Aying human makuha ang resulta sa eksaminasyon nga gihimo sa PNP Crime Laboratory sa mga ebidensiya nga ilang gisumiter.
Si Aying kasamtangang gibalhog sa detention cell sa kapolisan sa Lapulapu gumikan sa maong salaod. – BANAT NEWS
- Latest
- Trending
