CEBU, Philippines - Kritikal ang kondisyon sa usa ka lalaki human kini dunggaba sa upat ka minor de edad didto sa Humayhumay, barangay Gun-ob, dakbayan sa Lapulapu sa milabay’ng gabii.
Ang biktima mao si Dino Cabriana, 32, ulitawo ug residente sa maong dapit.
Base sa pasiunang imbestigasyon ni SPO2 Federick Eslit sa Crime Against Persons desk sa Lapulapu City Police Office, nasayran nga sayo pa niini nag-inom uban sa iyang mga higala si Cabriana sa usa ka tindahan diin ang mga minor de edad nahimutang sa pikas lamesa.
Pipila ka gutlo mitumaw ang panaglalis sa duha ka grupo ug human niini miduol ang usa ka batan-on hinungdan sa panag-away ni Cabriana ug sa maong minor de edad.
Sa dihang nakita sa mga kauban niining minor de edad, ilang gitabangan si Cabriana ug usa niini ang midunggab kaniya.
Si Cabriana samaran sa iyang dughan ug gidali pagdala sa Lapulapu City Hospital apan gibalhin sa Vicente Sotto Memorial Medical Center tungod kay kritikal ang kondisyon.
Samtang ang mga minor de edad daling nakapahilayo sa maong dapit human sa maong insidente. – BANAT NEWS