3 mil ka punoan sa Marijuana giibot sa Danao

CEBU, Philippines - Gibana-banang mokabat sa tres mil ka Marijuana stalks ang naibot sa bukirang bahin sa sitio Pulgason barangay Langosig sa syudad sa Danao niadtong Domingo sa hapon pinaagi sa gipahigayong operasyon sa mga barangay opisyales pinanguluhan sa ilang kapitan uban ang taga 78th Infantry Battalion ug kapolisan.

Si Editha Quimbo, kapitan sa nahisgutang barangay maoy nangulo sa pagpangibot sa Marijuana nga gikatahong gipanag-iya sa usa ka Arnel Capin nga molupyo usab sa maong lugar. Sa pakighinabi sa Banat News ni 2nd Lt. Jesus Binarao kini nagkanayon nga adunay mihatag kanila og impormasyon kabahin sa mga tinanom nga Marijuana sa bukirang bahin sa maong lugar.

Pasado alas-4 sa buntag dihang ilang gisusi ang lugar ug nakumpirmar nga dunay plantasyon niini hinungdan nga ilaha kining gipang-ibot, ang maong mga tanom gidala nganha sa buhatan sa Philippine Drug Enforcement Agency (PDEA-7).

Gisuwayan pa unta pagpangita sa kapolisan ug mga 78th IB personnel ang gidudahang suspetsado apan wala na kini igkita. Samtang sa pakighinabi sa Banat News sa hepe sa Danao Police station nga si Supt. Elmer Salado Lim kini nagkanayon nga mopahigayon og imbestigasyon batok sa suspek. - BANAT NEWS