Luigi pabor Ma-Lone district ang Mandaue sama sa Lapu'

CEBU, Philippines - Gipanghimakak ni kanhi Provincial Board Member Gabriel Luigi Quisumbing nga siya ug si 6th district Kongresista Nerissa Soon-Ruiz mobabag nga mamahimong lone district ang siyudad sa Mandaue.

Sumala pa ni Quisumbing sa interbyu sa DyRF nga pabor hinuon siyang ma-lone district ang Mandaue City sama sa dakbayan sa Lapu-lapu apan ipasubay kini sa laing paagi.

“I am in favor of declaring Mandaue City a lone district but I am more in favor of redistricting,” sigon pa ni Quisumbing.

Si Quisumbing miingon nga ang report nga iyang nahibaw-an gikan sa Commission on Election nga ang dul-an duha ka milyon nga voting population dinhi sa lalawigan sa Sugbu napun-an na og usa ka milyon nga bag-ong botante.

Sigon sa census sa National Statistics Office kon NSO niadtong tuig 2007, ang populasyon sa probinsiya sa Sugbu, apil ang dakbayan sa Lapu-lapu, niabot na og 3.85 ka milyon.

Gipasabot ni Quisumbing nga ang mga Sugbuanong kwalipikado kaayong makabaton og dugang representasyon ngadto sa Ubos Balay Balauranan.

Kini aron mahatagan og saktong pundo ang matag distrito sa probinsiya sa Sugbu alang sa mga proyekto ug mga programa gikan sa national government.

“The ultimate solution is redistricting kay kun ma-redistricting na ang whole province of Cebu sigurado gyud kong ma-lone district ang dakbayan sa Mandaue,” sigon pa ni Quisumbing.

Dugang pa ni Quisumbing nga nasayod siyang ang ubang mga Sugbuanong mga kongresista mosuporta gyud sa iyang lakang nga iyang himuong prayoridad nga buhaton sa higayon nga modaog kini sa pagkakongresista sa sixto distrito. - BANAT NEWS