3 ka magsuon giluba sa bayaw

CEBU, Philippines - Nalandig sa tambalanan ang tulo ka mga managsuon human gipanunggab sa ilang bayaw diha sa barangay Tipolo dakbayan sa Mandaue kagahapon sa kaadlawon.

Ang mga biktima mao sila si Sam Vincent Coronado, 23, Anolito Pinote, 26, ug Philip Pinote, 28, mga residente sa BYSB Road sa Tipolo dakbayan sa Mandaue.

Samtang ang gitumbok nga midunggab kanila mao ang ilang bayaw nga si John Sanoria, 33, residente usab sa maong dapit tungod sa panaglalis ug misangpot sa sinumbagay.

Matud pa ni PO3 Nersas Baay sa kapolisan sa station 2 sa MCPO unang gidunggab ni Sanoria si Coronado human sa ilang mainitong panaglalis ug sa dihang mipalit og sigarilyo si Anolito sa usa ka tindahan kalit kining gisukmag ug gidunggab usab ni Sanoria.

Si Philip pagkakita niini daling miuwang nila ni Anolito ug Sanoria apan nahiagum usab kini og bun-og human kini sukmaga ni Sanoria.

Si Coronado samaran sa iyang kamot, samtang si Anolito samaran sa iyang bagtak ug gidala kini sa Mandaue City Hospital samtang dali nga nakapahilayo ang suspetsado sa maong dapit. – BANAT NEWS