CEBU, Philippines - Talandugon ang kahimtang sa usa ka ulitawo dihang gipusil kini sa sakop sa karibal niyang fraternity didto sa seawall sa barangay Poblacion, dakbayan sa Danao sa miaging gabii. Ang biktima nailhan nga si Jade Escoton Giangan, 22, ulitawo nga taga barangay Suba sa maong dakbayan, samtang ang suspetsado nailhan usab nga si Renan Baton, hingkod nga silingan ra sa biktima.
Si SPO3 Arestito Espina sa Danao City Police Station mibutyag sa Banat News nga samtang nakig-estorya sa iyang mga barkada ang biktima didto sa daplin sa baybayon, kalit lang mitunga ang suspetsado ug sa walay hinungdan gipusil ang biktima. Ang biktima kinsa samdan sa ulo dali nga gihatod sa iyang mga barkada ngadto sa Danao City Hospital samtang ang suspetsado nadakpan usab dayon sa mga kapolisan pipila ka gutlo human sa maong hitabo. (BANATNEWS)