Dugang local power supplier nakatabang

CEBU, Philippines - Walay napatumang rotation brownout ang Visayan Electric Company (VECO) sugod niadtong Lunes bisan pa sa padayong pagkuwang sa supply sa kuryente sa Visayas grid sumala pa sa VECO. Ang tigpamaba sa Veco, Ethel Natera nagkanayon nga nakatabang niini mao ang pagdaginot sa pito ka mga dagkung kompaniya sa Sugbu ug nadugang nga 10 ngadto sa 12 megawatts nga supply sa kuryente gikan sa Semex sa siyudad sa Naga.

Matud ni Natera nga sulod ning semanaha gikatakda na sab nga mo-operate ang Cebu Energy Development nga makatabang og supply og dugang 72 megawatts gikan sa dakbayan sa Toledo.

Gipahibawo ni Natera nga pormal nang nakigpinirmahay ang kadagkuan sa Veco ug kasabotan pagpalit og dugang supply sa kuryente sa Cebu Energy Development nga moabot sa 105 megawatts. Gani ang presidente sa Cebu Energy Development nga si Jess Alcordo nipahibawo nga sugod sa miaging adlaw pormal nang misugod og operate ang usa sa tulo nila ka power plants nga dunay 72 megawatts.

Samtang ang ikaduhang planta nga dunay laing 72 megawatts mo-operate na usab sa bulan sa Mayo sa wala pay eleksyon, samtang ang ikatulong planta mo-operate sa buwan sa Disyembre niining tuiga. (BANATNEWS)