625 ka bata gitabangan sa World Vision

CEBU, Philippines - Mokabat sa 625 ka mga kabataan nga nagtungha sa mga tulunghaan sa publiko sa dakbayan sa Mandaue nakapahimulos sa programa nga gipasiugdahan sa World Vision International (WVI) nga giabagan usab ni Konsehal Noeleen Borbajo kinsa maoy chairman sa committee on education ug dean sa University of the Visayas Mandaue.

Ang maong gidaghanon sa mga kabataan naggikan sa mga tulunghaan sa barangay Subangdaku, barangay Guizo, ug barangay Mantuyong sa nahisgotang dakbayan.

Si Melvin Legaspi sa WVI nga nahinabi sa Banat News miingon nga mga anak sa kabus nga ginikanan ang maong mga kabataan nga ilang gitabangan nga makapadayon sa ilang pagtungha.

Matud pa niya nga tinguha nila nga molampos ang maong kabataan sa ilang pagtungha gikan sa elementarya hangtod na sa high school.

Samtang si Konsehal Borbajo nga nahinabi sa Banat News miingon nga gisuta usab nila ang nakuhang grado sa kabataan sa mga subject nga English, Math, Science ug uban pa nga maoy ilang basehan sa pagtudlo alang sa pagpalambo sa nakat-onan niini. (BANATNEWS)