CEBU, Philippines - Gitataw ni Kongresista Pastor “Jun” Alcover sa Alliance for Nationalism and Democracy (ANAD) Partylist nga wala nay mga komunistang rebelde dinhi sa lalawigan sa Sugbo nga mangilkil sa mga politiko human ikadeklarar ang Sugbo nga “insurgency free” sa military.
Sa gihimong Tapok-Tapok sa DYMR Radyo ng Bayan Cebu niadtong Sabado sa Baseline Restaurant, gibutyag ni Alcover nga gawasnon na karon ang mga politiko sa Sugbo gikan sa pangilkil sa mga komunistang New People’s Army (NPA) pinaagi sa gitawag nilang permit to campaign (PTC) ug permit to win (PTW)
Matud pa ni Alcover nga pinaagi sa iyang panlimbasug sa pagkulata pag-ayo pinaagi sa pagsaway sa maong grupo,dinuyogan sa military ug ni Gobernador Gwen Garcia, nanglayas ang mga rebelding NPA ngadto sa Negros ug uban pang bahin sa nasud.
Gani sa milabay'ng tuig nagsunod-sunod ang pagpanurender sa mga miyembro sa rebelding grupo ngadto sa kagamhanan diin atubangan sa mga kadagkuan sa militar ug ni Gobernador Garcia gitunol usab nila ang ilang mga armas de fuego uban sa panaad nga sila magbag-o na sa ilang lakaw sa kinabuhi ug hingpit nang mobuwag sa grupo sa mga rebelde. Busa kun may mga komunistang NPA sa ubang lalawigan nga nangilkil sa mga politiko pinaagi sa pagpatuman nila sa PTC ug PTW kana dili na mahitabo dinhi sa lalawigan.
Gipasabot ni Alcover nga ang PTC maoy permiso nga ihatag sa mga komunista ngadto sa mga kandidato nga makapangampanya sa sulod sa ilang teritoryo bisan walay kasiguroang modaog ,nga libre ug walay mobalda basta mobayad lamang sila sa tukmang presyo.
Hinuon kun ang usa ka kandidato gustong modaog sa usa ka lugar nga giharian sa mga rebelde, kinahanglang mobayad sila sa gitawag og PTW, nga mas mahal kini kay sa PTC kay padag-on man gyud sa mga rebelde ang maong kandidato diha sa ilang lugar. Busa alang kang Alcover mao kini ang tataw kaayong panguwarta sa mga rebelding komunista pinaagi sa paghasol sa mga katawhan aron sila molampos sa ilang mga binuang dinhi sa nasud.
Matud pa ni Alcover nga karong nahigmata na ang mga katawhan sa kabukiran bahin sa mga binuang sa mga NPA wala nay mga Sugbuanong nagpatonto kanila.
Apan sa ubang lugar nga humok mailad ang katawhan, nagpabilin gihapon sila nga nagpaulipon sa gahum sa mga komunista bisan nasayod sila nga wala sila'y kaugmaon diha sa maong pundok.
Biktima sa sunog hadlok mobalhin
Nagdumili sa pagbakwit ngadto sa laing lugar ang mga biktima sa sunog sa Sea Breeze, barangay Pusok, dakbayan sa Lapulapu sa kahadlok nga dili na sila makabalik sa pagpatukod sa ilang mga balay sa luna nga gipanag-iya sa kagamhanan.
Si barangay Kagawad Igay Patalingjug dihang nahinabi sa Banat News mipadayag nga gumikan sa pagdumili sa mga nabiktima sa pagpalayo sa lugar namutang nalang una sila og mga tulda nga temporaryong katulgan sa mga naapektahan.
Dugang pa ni Patalingjug nga mokabat na sa 15 ka sakong bugas ang gihatag sa kagamhanan sa dakbayan sa Lapulapu nga gipaagi sa pag-apod-apod sa City Social Welfare sa maong dakbayan alang sa kapin 100 ka pamilyang naapektahan.
Gitataw niya nga unang gihatag ngadto sa mga biktima ang mga ready to eat nga pagkaon, mga linata, noodles ug ang nag-unang mga gikinahanglan sama sa mga sapot ug uban pa.
Ang barangay gikatakdang mopaubos sa lugar sa state of calamity aron makagamit sila sa ilang calamity funds. (BANATNEWS)