Nagsuka sa dalan napunggit tipi

CEBU, Philippines - Patay ang usa ka lalaking giingong hubog atol sa pagsaulog sa Valentines Day human kini malamba sa taliwala sa karsada ug naligsan sa naghaguros nga taxi sa dalan M.L. Quezon sa barangay Cabancalan, dakbayan sa Mandaue alas 10:30 ang takna sa gabii.

Ang namatay mao si Elloterio Bentulan Jr., 30, taga Sunny Hills, Talamban, dakbayan sa Sugbo samtang wala pa mailhi sa kapolisan kun si kinsa ang nakaligis niini gawas lang sa kasayurang usa kini ka taxi apan daling mipaturatoy og padagan human makadasmag.

Si SPO4 Vicente Benabaye, imbestigador sa traffic division sa Mandaue City Police Office (MCPO) miingon nga base sa ilang imbestigasyon nagsakay ang biktima og taxi nga nagdala sa plate number GXH 787 ug gimaneho ni Gavino Mangubat.

Gikatahong gikan sa dakbayan sa Sugbo ang biktima nga hubog kaayo ug nagpahatod sa ilang panimalay sa Sunny Hills sa Talamban apan pag-abot diha sa nahitaboan kalit kining misuka.

Tungod niini gipahunong ni Mangubat ang taxi ug gipasuka sa daplin sa karsada ang biktima apan dihang pasakyon na kini og balik gikatahong mikisi-kisi kini ug natumba padulong sa tunga sa karsada. Naatol usab pagkatumba niini ang pag-agi sa naghaguros nga laing taxi ug napunggit kini ug naligsan, apan ang taxi nga nakaigo wala mohunong ug giingong milahos og ikyas.

Ang biktima nakaangkon og grabeng kadaot sa lawas nga gituohang nakaingon sa hinanali niining kamatayon. (BANATNEWS)