Cebu Customs nabalaka

CEBU, Philippines - Wala'y angayang ikabalaka ang Customs Port of Cebu sa implementasyon sa Attrition Law karong mga panahona sumala pang Bureau of Customs Commissioner Napoleon "Boy" Morales atol sa pakighinabi sa mga sakop sa media atol sa pagbisita niini sa milabay'ng Biyernes.

Matud pa ni Morales dili angayang mabalaka si Cebu Customs District Collector Atty. Ronnie Silvestre kalabot niini gumikan sa taas nga target collection sa Cebu ning tuiga nga mokabat sa P7.6 bilyones.

Gipasabot ni Morales nga ang paghatag og taas nga collection target sa mga sangang buhatan sa BOC usa lamang ka pagbanabana kung unsay   angayang makolekta.

Tuyo lamang niini nga bisan pa og pakyas pagkab-ot sa target tan-awon gihapon ang ilang paningkamot, kadtong district offices nga maninguha dili maapektahan sa Attrition Law.

 Samtang si Silvestre sa iyang bahin mipadayag nga ilang paninguhaon nga makuha ang P7.6 bilyones karong tuiga pinaagi sa pagdani sa ubang mga importers ug exporters nga dinhi sa Sugbu mohimo sa ilang transaksyon.

Sa milabay'ng tuig 2009, nakakolekta og P5.6 bilyones ang Cebu nga 10 porsiyento mitaas kun itandi sa 2008 nga koleksyon. – BANAT NEWS