CEBU, Philippines - Naangol ang usa ka taxi drayber human mosuway og sukol sa manag-uyab niyang pasaherong gikan pa sa motel nga mitulis kaniya sa miaging kaadlawon.
Ang biktima mao si Reneboy Paderga, 38, taga barangay Apas sa dakbayan sa Sugbo samtang ang mga gikatahapan mao ang manag-uyab nga pasaherong iyang gi-pickup sa usa ka motel ug nagpahatud sa dakbayan sa Lapulapu.
Si PO2 Renato Berdon sa Presinto 2 nga nahinabi sa Banat News, miingon nga samtang nagdagan diha sa North Reclamation Area kalit siyang gitionan og kutsilyo sa pasaherong lalaki nga naglingkod sa front seat.
Gipangayo sa tulisan ang P2,400 nga kinitaan sa pagpamasahero niini apan nagdumili kini ug gitapi ang kutsilyo apan giduslak siya niini diha sa bukton.
Tungod sa kahadlok miambak gawas sa taxi ang biktima ug mikaratil og dagan paingon sa Presinto 2 sa kapolisan sa pagtaho sa iyang gidangatan.
Ang grupo ni Inspector Alexander Rodriguez daling misusi sa maong dapit apan wala na diha ang mga tulisan ug gibiyaan ang taxi unit sa biktima. – BANAT NEWS