Gwen ug Glenn may "date" karon

CEBU, Philippines - Pahimuslan ni Gobernador Gwen Garcia ug ni Glenn Soco, kandidato sa pagka-bise gobernador karong adlawa, Valentines Day ang pagpalambo sa ilang gugma sa usa’g-usa ngadto sa mga katawhan pinaagi sa pagsuroy ngadto sa mga lungsod sa habagatan aron makigsandurot sa mga lungsoranon.

Sa ilang date, gibutyag ni Gobernador Garcia nga moadto sila sa Barili, Dumanjug, ug Balili property sa dakbayan sa Naga aron manghatag og mga saging, kamote ug uban pang mga tanom nga pagkaon sa mga molupyo sa maong mga lugar.

Unongan usab nila ang taga lungsod sa pagpananom og tanom nga pagkaon sa kaumahan isip paghatag og dugang kahulogan ning adlaw sa gugma karong adlawa.

Sa bahin ni Soco misaad siya nga ihalad niya ang iyang gugma ug pagmahal sa pagpakigkuyog niya sa gobernador ning tibuok adlaw isip sumbanan sa mga katawhan nga magminahalay sa tanang higayon alang sa kamalinawon sa pagpuyo ug panginabuhi.

Samtang mosuroy ang gobernador ngadto sa kalungsoran, ang hepe sa kapolisan sa Cebu Provincial Police Office (CPPO) Erson Digal mipaalerto usab sa tanang kapolisan sa tibuok lalawigan aron bantayan ang kalinaw ug kahusay sa palibot ilabi na ning adlawa nga daghan ang magpahimulos sa ilang kainit ug katam-is sa gugma, busa kinahanglang walay makadisturbo kanila nga mga tawong dautan.   (BANATNEWS)