Mga eskuylahan ipakoral na

CEBU, Philippines - Si Regional Director Recarido Borgonia sa Department of Education (DepEd) sa Central Visayas miluwat og kamanduan kagahapon nga ipakoral na ang tanang pampublikong tulunghaan dinhi sa rehiyon.

Kini aron dili na masubli ang sama sa pagpusil patay sa usa ka maestro didto sa Binlod Elementary School sa barangay Binlod, lungsod sa Argao nga nahitabo niadtong Miyerkules sa hapon.

Gawas sa koral kinahanglang aduna gyuy security guard ang matag eskulahan aron nga walay mga kriminal nga makasulod niini.

Si Romeo Aquire Duran, gipusil patay sa wala hiilhing kriminal atubangan sa iyang mga estudyante sa sulod sa iyang lawak klasehanan.

Matud pa ni Borgonia nga kalikayan unta ang maong hitabo kun may security guard pa ang eskuylahan ug may koral pa usab unta.   (Chester Abadilla)   (BANATNEWS)