Babayeng nadasmagan sa traysikol milayat sa Mananga Bridge, angol

CEBU, Philippines - Maayong pagkalubong sa lapok ug gidudahang nakaangkon og bali sa kabukogan ang usa ka wala mailhing babayeng gibana-banang nagpanuigon sa kapin sa 40-anyos nga milayat kagahapon sa buntag sa Mananga Bridge sa dakbayan sa Talisay.

Sumala pa ni PO1 Roy Bacus sa Talisay Traffic Division sa Banat News nga ang maong babaye giingong unang nabag-iran sa drayber sa traysikol nga si Roberto Menoza samtang kini nagbiyahe padulong sa barangay Mohon.

Ang drayber gumikan sa kapuno sa iyang pasahero bisan giunsa niini paglubag ang manobela diha sa may flyover sa Tabunok naigo gyud sa sidecar ang maong babaye hinungdan nga natumba sa karsada

Daling gitabangan ni Menoza ug ang traffic enforcer nga si Ronald Hopia aron unta dad-on sa tambalanan tungod kay nagkadugo kini apan pag-abot nila sa Mananga Bridge naghuot ang mga sakyanan maong nag-aginod sila apan kalit mikanaog ang babaye.

Diha-diha gigukod ni Menoza ug Hopia ang babaye apan nakugang nalang sila dihang mipatong kini sa railings sa taytayang may gitas-on 50 ngadto sa 60 ka tiil ug milayat sa ubos ug adto mitugpa sa lapok.

Ang mga residente sa lugar mao nay mitabang paghulbot sa babaye gikan sa lapok ug gidala sa Talisay Rescue Emergency Action Team (TREAT) ngadto sa Talisay City District Hospital. (Brenda Batuto)   (BANATNEWS)